ad1
ad1

.غضب امهات مصر من تصريحات وزير التعليم . . احنا مش قاعدين علي الفيس 24 ساعة و بنشتغل ونذاكر لعيالنا وطالع عينينه

0 302

 

حاله من الغضب الشديد انتابت امهات مصر بسبب تصريحات وزير التربية والتعليم الدكتور طارق شوقي الذي وصف فيها امهات مصر بانهم يجلسون طوال ال24 ساعة علي الفيس،ويتركون ابنائهم ، عبر الامهات خلال صفحات وجروبات التواصل الاجتماعي عن استيائهم الشديد، من كلام الوزير،واخذت عدد كبير من الامهان يرسلون رسائل للدكتور شوقي،رصدتها( تواصل ) وتنقل بضعها كماهي

تقول احدي الامهات : حضرتك انا كأم لثلاث أطفال أولى ثانوي (الكارثية)  وكيجي وان. بصحي خمسة علشان الفطار والساندوتشات. بفطر واوصل المدارس واروح شغلي ويتهد حيلي وبعد كده اروح أربعة اجري بهدومي اجهز الأكل وبعد كده المواعين والمذاكرة والدروس وتنضيف الشقة وتحضير الغدا لليوم اللي بعده ويجي العشا ومرة تانيه المواعين ويا دوب الواحد بيبقى شايف الطريق للسرير دي الأم المصرية ست بيت وام وموظفة وممرضه ومدرسة وسباك أحيانا ومدير مالي وكل حاجة حضرتك انت بقى بتعمل ايه غير قراراتك الكارثية؟
.. والله قاعدين ليل نهار نودي دروس ونذاكر جالنا اكتئاب خلاص وبناخد مهدئات …مش بقول لحضرتك انك مش عايش الواقع
وتقول ثانيه: امهات مصر فى الشوارع طول اليوم بيجروا من درس لدرس لتمرين عشان يسدوا فراغ جهة تسمى بالتربية والتعليم
اه احنا اللى خرجنا مصر من التصنيف العالمى…واحنا اللى خلينا ولادنا فى الثانوية العامة ينتحروا…واحنا اللى بنخلى 60 عيل يقعدوا فى فصل زى علبة السردين..واحنا اللى حطينا المناهج اللى منكدة علينا و على عيالنا…اقولك..احنا اللى اكلنا الجبنة !!

وتقول ام ثالثه: وربنا ماحصل اكيد بنام شويه علي شأن نتابع مصائب التعليم،.انت إلي فاضي علشان كل يوم بقرار جديد.

مين اداك الحق تتكلم علي اي ام وتربيتها لعيالها اتكلم في اللي يخصك بس ..وام اخري تقول

ههههههه لا احنا عاملين ورديات علي النت علشان نتابع
لغيتوا سنه كام
هل الامتحان ورقي ولا تابلت
في اعمال سنه ولا لا
اخبار المستوي الرفيع
اخبار التجريبي
احنا كل يوم خبر جديد وقرارات جديدة لما فقدنا قدرتنا علي التحاور

.فين حضرتك قاعدين على النت حرام عليك دة احنا مبنخرجش من البيت ولا بقينا نزور بعض ولا حتى بقينا نتكلم مع اولادنا غير في المنهج
انت معاك حق اننا مش فاضيين نربي اولادنا لأننا بنقوم بدور المعلم والمتابع ولاننا مش بنشوف ولادنا غير ساعتين تلاتة في اليوم مبقاش عندنا الوقت احنا وولادنا عشان نتكلم معاهم عن مشاكلهم أو نتكلم معاهم عن الغلط والصح
اتقي الله فينا حضرتك ومستشارينك واحنا نوعدك بجيل على اعلى مستوى من الأخلاق والتربية بس انت اضمن لنا اعلى مستوى تعليمي.

 

 

 

اترك تعليق

يرجي التسجيل لترك تعليقك

شكرا للتعليق