DFP

- Advertisement -

ad11
ad11

انتم مش التلفزيون المصري.. اعلاميه كبيره ترد علي برمو الابراشي

0 258

مازالت صدي ازمة احنا التلفزيون المصري مشتعله علي نار هاديه، نظرا لان عقول الاعلاميين في ماسبيرو، يتعاملوا مع الامر بخبرة السنين التي اكتسبوها، وعلي فترات قصيرة تخرج من هوانم ماسبيرو كلمات تصيب ولاتجرح، تعطي الدواء للمسئول الذي لايدرك اهمية القوي الناعمه، التي تمتلكها مصر، وهي بالطبع في امس الحاجه اليها، واصحابها هم ادري بها،.. تقول الاعلاميه هاله ابو علم في حسابها الخاص علي مواقع التواصل الاجتماعي

برومو برنامج التاسعة اللي حيقدمه وائل الأبراشي و معه مذيعة ( لا أعرف أسمها ) بيقولوا فيه ( أحنا التلفزيون المصري )
و مع أحترامي لزملائي المشاركين ..
طيب ..
جيتوا تأخذوا فرص آخرين كانوا بيشتغلوا في نفس التوقيت
و قلنا طيب ..
اتلغت نشرة ٩ و هي النشرة الرئيسية في التلفزيون المصري علي مدار سنوات طويلة و يتابعها الجمهور في مصر و العالم و ارتبط بها المشاهدون من صغرهم و لغاية دلوقت ..
و قلنا طيب ..
وفرتوا كل الإمكانيات المادية و البشرية للبرنامج و لم توفروها لأصحاب البيت الأصليين ..
و قلنا طيب ..
قلتوا علي التلفزيون المصري إنه فاشل و اللي بيشتغلوا فيه فشلة و منعتوا ضخ أي دماء جديدة فيه و وقفتوا التعيين لأن فيه عمالة زيادة و كمالة عدد و توصل لستين ألف عامل ( و طبعا كلها اشاعات )
و قلنا طيب ..
أخترتم مجموعة تشتغل و مجموعة لم ينالها حظ او شرف الأختيار و أصابها ما أصابها من إحباط ..
و قلنا طيب ..
لكن .. تتمسحوا في التلفزيون المصري و تطلعوا دون ذرة من خجل تقولوا ” احنا التلفزيون المصري ”
يبقي ” لأ ” و ألف ” لأ ” ..
لأنكم مش منه .. و عمركم ما حتكونوا منه ..
تعرفوا ايه أنتم عنه ..؟
تعرفوا بين الدور و الدور كام سِلمة ؟
حطيتوا أيديكم علي حطانه تتسندوا في الطلعة و النزلة عشرة عشرين سنة ؟
تعرفوا الأذاعة الدور الكام ؟
تعرفوا الطرقة بتاعتها مفتوحة و لا مقفولة ؟
اشتغلتوا و قبضتوا ملاليم متفتحش بيوت بس كنت بتروحوا مبسوطين إن ربنا ساترها معاكم و تبوسوا أيدكم وش و ظهر ..؟
تعرفوا عم عريان او ناصر ؟
اتجمعتوا بعد ( صباح الخير يا مصر ) في استوديو ١٦ مذيعين و مخرجين و معدين و فنيين تفطروا فول و طعمية سخنة و عيش بلدي لسة طالع من الفرن من جنب المبني؟
جربت تصحي ٣ و ٤ الفجر و تمشي و الناس لسة نايمة علشان عندك شيفت اذاعة تقدم فيه ( عالم الصباح ) و تذيع لهم ( يا صباح الخير ياللي معانا ) ؟
سافرتوا تعملوا أذاعة خارجية في شرق العوينات و أنتم راكبين عربية دوبل كابينة يعني نص نقل ؟
تقدر تقولي مين الأساتذة اللي قابلتهم و أتعلمت علي أيديهم .. صبري سلامة و لا محمد سناء و لا عواطف البدري و لا أحمد رضوان و لا زكريا عشوش و لا هالة الحديدي و لا أمنية عزمي و لا سناء منصور و لا إيناس جوهر و لا حكمت الشربيني و لا ابراهيم صبري و لا عمر بطيشة و لا وجدي الحكيم و لا نادية صالح و لا عبد الوهاب قتاية و لا فاروق شوشة و لا أمين بسيوني و لا ….
ممكن اقعد اذكر أسماء أساتذة و فطاحل الأعلام المصري و العربي من هنا لحد بكرة ..
اشتغلتم أثناء فرض حظر التجوال و مكنش حد بيشتغل أو يمشي في الشارع غيركم ؟
اشتغلتم و الحصار مفروض علي مبني ماسبيرو و قوات الجيش و الشرطة حواليه و المتظاهرين رأسهم و الف سيف ميتظاهروش الا قدّامه و مع ذلك نزلت من البيت و دخلت المبني بأعجوبة علشان بعد كدة تطلع تأدي واجبك كما هو مطلوب و بلا تقصير ؟
نفذت شيفتاتك في رمضان و الناس كلها قاعدة مع عيلتها تفطر و انت متقدرش تاكل الا بعد الشغل ما يخلص و تروح ؟
عشت أيام مصر الهامة و أنت زي الجندي اللي علي خط النار جاهز للنزول و الشغل في الشارع و جوة الاستوديو وقت ميطلبوك ساعة الفجر أو عز الليل ؟
نمت علي كرسي جوة الاستراحة علشان تقوم تقول موجز ٣ و ٥ صباحًا و الناس في بيتها متغطية في عز التلج و البرد ؟

أنا متأكدة إن الأجابة معروفة ..

يبقي أنتم مش التلفزيون المصري ..
و لا عمركم حتكونوا التلفزيون المصري
عارفين ليه ؟
لأن الجمهور ذكي و عارف أنتم مين ..
أنتم ( مش التلفزيون المصري ) ..

ملحوظة : أنا مش ضد التطوير أو التغيير و لكن .. أنا مع تسمية الأشياء بمسمياتها الحقيقية ..
.

اترك تعليق

يرجي التسجيل لترك تعليقك

شكرا للتعليق